ప్రముఖ సినీ నటుడు, నిర్మాత బండ్ల గణేష్, ఆంధ్రప్రదేశ్ ముఖ్యమంత్రి నారా చంద్రబాబు నాయుడుపై తనకున్న అచంచల అభిమానాన్ని మరోసారి వినూత్నంగా ప్రదర్శించారు. చంద్రబాబు నాయకత్వ పటిమను, ఆయన విధానాలను తరచూ ప్రశంసించే బండ్ల గణేష్, ఈసారి నేరుగా ముఖ్యమంత్రి సొంత గ్రామమైన నారావారిపల్లికి వెళ్లి తన గౌరవాన్ని చాటుకున్నారు.

అక్కడ చంద్రబాబు తల్లిదండ్రులైన స్వర్గీయ ఖర్జూరపు నాయుడు, అమ్మనమ్మల సమాధులను సందర్శించి పుష్పాంజలి ఘటించారు. ఈ పర్యటనకు సంబంధించిన తన భావోద్వేగభరిత అనుభవాన్ని సోషల్ మీడియా ప్లాట్‌ఫామ్ 'ఎక్స్' వేదికగా ఆయన పంచుకున్నారు.

ఈ సందర్భంగా చంద్రబాబు నాయుడిని 'వాటర్‌మ్యాన్ ఆఫ్ ఏపీ'గా అభివర్ణించిన బండ్ల గణేష్, ఒక మహానాయకుడిని ఈ ప్రపంచానికి అందించిన ఆయన తల్లిదండ్రులకు శిరస్సు వంచి నమస్కరిస్తున్నానని పేర్కొన్నారు. తన 'ఎక్స్' ఖాతాలో ఆయన ఈ విధంగా రాసుకొచ్చారు.

"ఈరోజు నారావారిపల్లిని సందర్శించి, వాటర్‌మ్యాన్ ఆఫ్ ఏపీ, మన ముఖ్యమంత్రి చంద్రబాబు గారికి జన్మనిచ్చిన మహనీయులు ఖర్జూరపు నాయుడు గారు, శ్రీమతి అమ్మనమ్మ గారి సమాధులను దర్శించుకుని, ఆ సమాధులను తాకిన క్షణంలో నా మనసులో ఒక తీయని అనుభూతి కలిగింది. ‘ఎంత గొప్ప బిడ్డను కన్నారమ్మా.. మీకు జన్మనిచ్చిన తల్లిదండ్రులుగా మీరు ఎంత అదృష్టవంతులో, మీలాంటి మహనీయులను తల్లిదండ్రులుగా పొందినందుకు చంద్రబాబు గారు అంతే అదృష్టవంతులు’ అని మనసులో అనిపించింది" అని తన అనుభూతిని వివరించారు.

అంతటితో ఆగకుండా.. "దేశం కోసం, రాష్ట్రం కోసం నిరంతరం శ్రమించే ఒక మహానాయకుడిని ఈ ప్రపంచానికి అందించిన ఆ తల్లిదండ్రులకు శిరస్సు వంచి నమస్కరిస్తున్నాను. ఆ మహనీయుల ఆశీస్సులు, ఏడుకొండలవాడి కృప ఎల్లప్పుడూ చంద్రబాబుపై, వారి కుటుంబంపై ఉండాలని మనస్ఫూర్తిగా కోరుకుంటున్నాను" అని బండ్ల గణేష్ తన పోస్టులో పేర్కొన్నారు.

గత కొంతకాలంగా తెలుగుదేశం పార్టీకి, ముఖ్యంగా చంద్రబాబుకు బండ్ల గణేష్ గట్టి మద్దతుదారుగా నిలుస్తున్న విషయం తెలిసిందే. ఎన్నికల ఫలితాల అనంతరం కూడా అనేక సందర్భాల్లో ఆయన చంద్రబాబు నాయకత్వాన్ని ఆకాశానికెత్తారు. ఇప్పుడు ఏకంగా నారావారిపల్లికి వెళ్లి నివాళులు అర్పించడం ద్వారా తన అభిమానాన్ని మరో స్థాయికి తీసుకెళ్లారు. ప్రస్తుతం బండ్ల గణేష్ చేసిన ఈ పోస్ట్ సోషల్ మీడియాలో వైరల్ అవుతుండగా, టీడీపీ శ్రేణులు, అభిమానులు దీనిపై హర్షం వ్యక్తం చేస్తున్నారు.