విజయవాడలో భారీగా పేలుడు పదార్థాలు పట్టుబడటం తీవ్ర కలకలం రేపింది. నగరంలోని పండిట్ నెహ్రూ బస్టాండ్ (పీఎన్‌బీఎస్‌) పోలీస్ ఔట్‌పోస్ట్ వద్ద ఓ బ్యాగులో 46 జిలెటిన్ స్టిక్స్, 50 ఎలక్ట్రిక్ డిటోనేటర్లను పోలీసులు స్వాధీనం చేసుకున్నారు. బ్యాగుల తారుమారు కారణంగా ఈ ఘటన వెలుగులోకి వచ్చింది.

వివరాల్లోకి వెళితే.. ఉత్తరప్రదేశ్‌కు చెందిన ఆసిఫ్ అలీ అనే ప్రయాణికుడు సోమవారం రాత్రి నరసరావుపేట నుంచి విజయవాడకు ఆర్టీసీ బస్సులో వచ్చాడు. బస్సు దిగాక తన లగేజ్ బ్యాగ్‌కు బదులుగా మరొకరి బ్యాగ్ తన వద్దకు వచ్చినట్లు గుర్తించాడు.

అనుమానంతో ఆ బ్యాగ్‌ను తెరిచి చూడగా, అందులో పేలుడు పదార్థాలు ఉండటంతో షాక్‌కు గురయ్యాడు. వెంటనే అప్రమత్తమై పీఎన్‌బీఎస్ వద్ద ఉన్న పోలీస్ ఔట్‌పోస్టుకు వెళ్లి పోలీసులకు సమాచారం అందించాడు.

సమాచారం అందుకున్న కృష్ణలంక పోలీసులు వెంటనే రంగంలోకి దిగారు. బ్యాగును స్వాధీనం చేసుకుని దర్యాప్తు ప్రారంభించారు. ఈ పేలుడు పదార్థాలను ఎక్కడి నుంచి ఎక్కడికి తరలిస్తున్నారు, ఈ బ్యాగ్ ఎవరిది అనే కోణంలో విచారణ ముమ్మరం చేశారు. సమాచారం అందించిన ఆసిఫ్ అలీని సైతం ప్రశ్నిస్తూ, అతని ప్రయాణ చరిత్రను పరిశీలిస్తున్నారు.

బస్సులోని సీసీటీవీ ఫుటేజీని క్షుణ్ణంగా విశ్లేషిస్తున్నారు. అనుమానాస్పద వస్తువులేవైనా కనిపిస్తే వెంటనే సమాచారం ఇవ్వాలని పోలీసులు ప్రజలకు సూచించారు. ఈ ఘటనపై పూర్తి వివరాలు దర్యాప్తులో తేలాల్సి ఉంది.